1 маусым Халықаралық балаларды қорғау күніне орай 16 жасқа дейінгі балаларға Болашақ энергиясы мұражайына кіру тегін болады, деп хабарлайды Turanaqparat.kz QazExpoCongress-ке сілтеме жасап.
Экспонаттар, интерактивті қондырғылар, виртуалды шындық аймағы және басқа да контент түрлері балалар мерекесін жасыл технологиялар әлеміне танымдық саяхатқа айналдырады.
Бұл күні мұражайда «Көркем-ай», «Тұмар», «Бастау» хореографиялық ансамбльдері, сондай-ақ Ақмарал Дәулет пен Гүлназ Ермекова сияқты жас өнерпаздардың қатысуымен «Бақытты балалық шақ» атты мерекелік концерт өтеді. Концерттік бағдарламаның басталуы сағат 12:00 мен 15:00-ге жоспарланған. Іс-шара Salem, alem! телеарнасында көрсетіледі.
Сонымен қатар мұражайдың бірінші қабатында этнограф-топтамашы Бахаргүл Төлегеннің «Жауһар жәдігер» көрмесі тұрақты негізде өтіп жатыр, онда бірнеше ғасырлық тарихы бар үлкен мәдени құндылықты бейнелейтін бұйымдар ұсынылған.
Мұражайдың жұмыс кестесі сейсенбіден жұмаға дейін сағат 10:00-ден 20:00-ге дейін, сенбі, жексенбі және мереке күндері сағат 10:00-ден 21:00-ге дейін, дүйсенбі – техникалық күн.
Сондай-ақ 1 маусымда EXPO кешенінің аумағында роллердром алаңының ашылуы өтеді. Мереке күні 14 жасқа дейінгі балалар роликті тегін тебе алады. Роллердромның жұмыс уақыты жұмыс күндері сағат 14:00-ден 23:00-ге дейін, ал демалыс күндері сағат 10:00-ден 23:00-ге дейін. Бұдан бөлек бұл күні жасөспірімдер мен ерекше қажеттіліктері бар балалар үшін бейімделген бірегей ойын алаңы орналасқан саябақ аймағында серуендеуге де болады.
