Корея Республикасының Қазақстандағы елшісі Чжо Тэ-ик 1 наурыз қозғалыс күніне орай тәуелсіздік үшін күрескен қайраткердің қабіріне зиярат етті, деп хабарлайды Turanaqparat.kz.
27 ақпанда елші Чжо Тэ-ик Қарағанды облысы, Балқаш қаласындағы Старое зиратында орналасқан тәуелсіздік күрескері Чжо Чанвонның қабіріне барып, гүл шоғын қойды.
Бұл іс-шара Корея Республикасының Патриоттар және ардагерлер істері министрлігі ұйымдастырған «Кореяның азаттық алғанына 80 жыл және 1 наурыз қозғалыс күніне орай тәуелсіздік күрескерлерінің қабіріне зиярат ету» атты кампания аясында өтті. Салтанатты рәсімге әскери атташе Ким Чжонхве, консул Чжи Хэсун, сондай-ақ Балқаш қаласындағы Қарағанды облысы корейлерінің этномәдени бірлестігінің жетекшісі Цай Александр, оның орынбасары Огай Дмитрий және Балқаш қаласындағы корей қауымдастығының өкілдері – Югай Андрей, Ким Светлана, Югай Лариса, Ли Виталий, Ли Дарья және басқалар қатысты.
Қатысушылар 2006 жылы Чжо Чанвонға мемлекетке сіңірген еңбегі үшін ордені марқұм болған соң берілгенін атап өтіп, оның ерлігі туралы оқып, гүл шоқтарын қойып, бір минут үнсіздікпен тағзым етті.
Біз тәуелсіздік үшін күрескен қайраткерлердің жанқиярлық ерлігіне терең ризашылығымызды білдіреміз. Корея Республикасы үкіметі олардың ерлік рухын сақтап, болашақ ұрпаққа жеткізу үшін күш-жігерін жалғастырады, – деп атап өтті елші Чжо Тэ-ик.
Сонымен қатар ол Чжо Чанвонның қабірін табуға және еске алу рәсімін ұйымдастыруға белсенді қатысқаны үшін Балқаш қаласындағы Қарағанды облысы корейлерінің этномәдени бірлестігіне ерекше алғысын білдірді.
