Мемлекет басшысы Қасым-Жомарт Тоқаев Беларусь Республикасының сыртқы істер министрі Максим Рыженковты қабылдады.
Кездесу барысында Президент қазақ-белорус стратегиялық серіктестігінің жоғары қарқынмен дамып келе жатқанын атап өтті.
«Біз сіздермен барлық салада ынтымақтастықты дамытуға айрықша назар аударамыз. Беларусь мемлекеттілігіне, оның төл мәдениеті мен тарихына құрметпен қараймыз. Ықпалдастығымыз, әсіресе, экономикалық салада дәйекті түрде дамып келеді деп айтуға толық негіз бар. Осы мүмкіндікті пайдалана отырып, Беларусь мемлекетінің басшысы Александр Григорьевич Лукашенкоға ыстық ықыласымды жолдаймын. Биыл мамыр айында Жоғары Еуразиялық экономикалық кеңес отырысын өткіземіз. Сол кезде көпжақты күн тәртібінен бөлек, елдеріміз арасындағы ынтымақтастықты дамытуға байланысты басқа да мәселелерді міндетті түрде талқылаймыз», – деді мемлекет басшысы.
Қасым-Жомарт Тоқаев белсенді әрі өзара сенімге құрылған диалогты жалғастырудың, сондай-ақ жоғары деңгейде қол жеткізілген келісімдерді іске асырудың маңыздылығын атап өтті.
