Денсаулық сақтау министрлігінің мәліметінше, Қазақстанда қызылшамен сырқаттану деңгейі шамамен 30 пайызға төмендеген. Алайда эпидемиологиялық жағдай әлі толық тұрақталған жоқ.
Соңғы бір аптада елімізде қызылша жұқтырған 212 бала тіркелген. Ал оған дейінгі аптада бұл көрсеткіш 302 болған. Осылайша, сырқаттану деңгейі ресми дерек бойынша айтарлықтай азайған.
Дегенмен, ауру ең көп тіркелген өңірлер қатарында Астана қаласы алда тұр – 46 жағдай. Одан кейін Павлодар облысында – 38, Алматы қаласында – 20 және Қарағанды облысында 19 науқас анықталған. Бұл көрсеткіштер инфекцияның әлі де белсенді таралып жатқанын көрсетеді.
2025 жылдың қорытындысы бойынша елде 4 240 адам қызылша жұқтырған. Оның 76,4 пайызы – екпе алмағандар. Яғни, әр төрт науқастың үшеуі вакцинациядан өтпеген.
Министрлік вакцинация жұмыстары жалғасып жатқанын атап өтті. Қазіргі таңда 1 жастағы 69 мың бала, 6 жастағы 66,8 мың бала екпе алған. Сонымен қатар 18 жасқа дейінгі 58,2 мың бала мен жасөспірім де вакцинациямен қамтылған.
