«Алматы – Өскемен» автожолының Алакөл ауданы аумағындағы 474-шақырымында үш автокөлік қатысқан ірі жол-көлік оқиғасы орын алды.
Полиция департаментінің мәліметінше, аталған факті бойынша сотқа дейінгі тергеп-тексеру жұмыстары басталды.
Алдын ала деректерге қарағанда, Kia Sportage автокөлігінің жүргізушісі рульге ие бола алмай, қарсы қозғалыс жолағына шығып кеткен. Салдарынан ол алдымен Toyota Highlander, содан кейін осы бағытта келе жатқан Lexus GS300 автокөлігімен соқтығысады.
Kia Sportage автокөлігінің жүргізушісі мен оның екі жолаушысы алған жарақаттарынан оқиға орнында көз жұмды.
Тағы алты адам түрлі дене жарақатымен медициналық мекемелерге жеткізілді.
Қазіргі уақытта полиция қызметкерлері қажетті тергеу әрекеттерін жүргізіп, оқиғаның толық мән-жайын анықталып жатыр.
«Барлық жол қозғалысына қатысушыларды жол қозғалысы қағидаларын қатаң сақтауға, жылдамдықты асырмауға, қауіпті маневрлер жасамай, қарсы бағытқа шықпауға шақырамыз. Бірнеше секундтық тәуекел адам өмірін қиюы мүмкін. Өз өмірлеріңіз бен жақындарыңыздың қауіпсіздігіне жауапкершілікпен қараңыздар», — деп ескертті тәртіп сақшылары.
