Бұрынғы Мәдениет министрі Арыстанбек Мұхамедиұлына тиесілі су және қолданбалы спорт түрлері бойынша республикалық жоғары спорт шеберлігі мектебі мемлекетке қайтарылды, деп хабарлайды Turanaqparat.kz.
Алматы қаласы Жетісу ауданы прокуратурасының талап-арызы бойынша құны 1,2 млрд теңге болатын мемлекеттік мүлік қайтарылды.
Алматы прокуратурасының мәлімдеуінше, 2024 жылғы 17 шілдеде Алматы қаласының Мамандандырылған ауданаралық экономикалық сотының су және қолданбалы спорт түрлері бойынша Республикалық жоғары спорт шеберлігі мектебін сату жөніндегі мәмілені жарамсыз деп тану туралы шешімі заңды күшіне енді, — делінген хабарламада.
Cотта нысанның нарықтық құнын 551 млн теңгеге төмендету көрініс тапқан заң бұзушылықтар расталды.
Әкімшілік ғимараттардың, спорт залдарының және басқа да құрылыстардың 7,6 мың шаршы метр, сондай-ақ 4,9 га жерді құрайтын мектептің мүлкіне, Арыстанбек Мұхамедиұлымен аффилиирленген тұлғаларға тиесілі «Nomad’s Land» ЖШС иелік еткен.
Сот үкімімен Мұхамедиұлы кінәлі деп танылып, 11 жылға бас бостандығынан айырылған болатын. Сондай-ақ оған өмір бойы мемлекеттік қызмет атқаруға тыйым салынды.Сонымен бірге адвокаты Төлеев 6,8 жылға бас бостандығынан айырылған еді. Оған экс-мәдениет министрі және одан кейін Ұлттық музейдің директоры болған уақытында ұрлық жасаған деген айыптар тағылды.
Жақында оның әйелі Ғалия Ысқақоваға қатысты сот үкімі өзгертілді.
