23 қаңтарда сағат 00:09-да Алматыда жер сілкінісі болды. Оның эпицентрі Қырғызстан мен Қытай шекарасында орналасқан жерде тіркелді, деп хабарлайды Turanaqparat.kz.
Алматы — 5 балл, Шымкент-2 балл. Жер сілкінісі Астана, Алматы қалалары, ШҚО, Жамбыл, Жетісу және Қарағанды облыстарында сезілді.
Ресми органдардан ешбір ақпарат түспеген соң халық дүрбелеңге салынды. Қалада ешқандай дабыл қағылмады. 112-ден де sms-хабарлама жер сілкіну болғаннан кейін екі сағат өткен соң келген.
Әлеуметтік желіде БАҚ өкілдері жер сілкінісіне қатысты барлық ақпарат тек орыс тілінде берілгенін жазып, наразылықтарын айтты.
Ең алғашқы видеоүндеуді ТЖМ мен сейсмологтар орыс тілінде жеткізді.
Осы әрекетке қатысты «Қазақтар, сендер бірің өліп, бірің қал» дегені ме?» сынды наразылықтар айтылып жатыр.
Оған қоса бүгін Үкімет отырысында күн тәртібінен тыс Алматыдағы жер сілкінісі талқыланды. Онда да Төтенше жағдайлар министрі Сырым Шәріпханов пен Премьер-министр Әлихан Смайылов ресми тіл – орыс тілінде ғана ақпарат берді.
Еске салсақ, осыған дейін ресейлік тележүргізуші Тина Канделаки Қазақстанда орыс тілін жоюға әрекет етіп жатыр деп байбалам салған еді.
Аягөз Құрмаш
