Шымкент жастары «Отбасындағы зорлық-зомбылыққа қарсы Қазақстан» жобасын қолдайды. Шымкент қаласы ішкі саясат және жастар істері жөніндегі басқармасының ұйымдастыруымен «М.Тынышпаев атындағы Қазақ көлік және коммуникациялар академиясының Шымкент көлік колледжі» жастарымен өткен кездесуде жобаның маңыздылығын жастарға түсіндірді. Кездесуге оқу ордасының 70-ке жуық студент-жастары қатысты.
Бүгінгі таңда елімізде тұрмыстық зорлық-зомбылықтың алдын алу, ақпараттық насихаттық жұмыстарды кеңінен жүргізу, жастар арасында отбасы құндылықтарын насихаттау арқылы ұлттық отбасы институтын нығайту мәселесі өзекті. Басқосуда өзекті мәселелердің алдын алудың түйіні тарқатылып, жауапты мамандар өз ойларын ортаға салды. «Шаңырақ» жастар мен жас отбасыларды қолдау орталығы қоғамдық бірлестігінің басшысы Байзахова Сабира Мұратқызы мен білікті психолог-тренер, коуч-практик, гештальт-терапевт Тұрсынбаева Айсұлу Полатқызы жастарды қызықтырған сұрақтарға жауап берді.
Жалпы кездесу барысында тұрмыстық зорлық-зомбылық – ауыр әлеуметтік салдары бар проблема екенін, ол өз алдына тек жәбірленушілердің құқықтарын бұзып қана қоймай, өскелең ұрпақ үшін теріс үлгі болып келетінін жастарға тайға таңба басқандай етіп түсіндірді. Отан – отбасынан басталатынын ескере отырып, жанұядағы береке-бірліктің сақталуына, отбасылық құндылықтарды кеңінен насихаттауға және ана мен бала құқықтарының қорғалуына күш салу қажеттігі, сонымен қатар, отбасында болған зорлық-зомбылыққа куә болған жағдайда қандай әрекеттер жасау қажеттігі айтылды.