Бүгін Ақордада Қасым-Жомарт Тоқаев Қаржылық мониторинг агенттігінің төрағасы Жанат Элимановты қабылдады.
Ақорданың мәліметінше, Жанат Элиманов президентке түрлі салалардағы экономикалық қылмыстар бойынша есеп берген. Оның ішінде міндетті әлеуметтік медициналық сақтандыру қорындағы ірі көлемдегі қаражаттың жымқырылуы туралы айтылған.
«Міндетті әлеуметтік медициналық сақтандыру қаражатын жымқыру фактілері бойынша 14 сотқа дейінгі тергеу басталды», – деді Элиманов.
Айта кетейік, жыл басында Әлеуметтік медициналық сақтандыру қорына бөлінген қаражаттың тиімділігіне жүргізілген IT-аудит өрескел заңбұзушылықтарды анықтаған. Бұл туралы үкімет отырысында Мәди Такиев мәлімдеген.
Такиевтің айтуынша, МӘМС жүйесінен 1,8 млрд теңге науқастардың жынысына сәйкес келмейтін медициналық тексерулерге жұмсалған. Мысалы, Қазақстанда 768 827 ер адам жатыр мойны обырына тексеруден өткен, сондай-ақ 619 ер адам маммографиядан өткен. Тек бір аудандық ауруханада (Алматы облысы) осындай 11 123 жағдай тіркелген.
