Алматы қаласында «Boxy Wealth» қаржы пирамидасын ұйымдастыру және оған басшылық ету фактісі бойынша тергеу аяқталып, қылмыстық іс сотқа жолданды. Бұл туралы Қазақстан Республикасының Қаржылық мониторинг агенттігі хабарлады.
Тергеу мәліметінше, күдікті бір жыл бойы интернет арқылы азаматтарды инвестициялық жобаға тартып, тәулігіне 5–10% көлемінде табыс табуға уәде берген. Жоба арнайы сайт пен мессенджерлер арқылы жұмыс істеген. Атап айтқанда, «Күнделікті табыс» чатында бастапқыда халық тұтынатын тауарлар жайлы ақпарат жарияланып, кейін пайдаланушылар инвестициялық платформаға шақырылған.
Қатысу үшін азаматтарға түрлі пакеттерді сатып алып, күн сайын жарнамалық материалдарды қарау ұсынылған. Сонымен қатар жаңа қатысушыларды тартқаны үшін бонус берілетін рефералдық жүйе де болған.
Қаражаттар жеке тұлғалардың (дропперлердің) банк шоттары арқылы қабылданып, кейін P2P операциялары арқылы криптовалютаға аударылған. Сенім қалыптастыру мақсатында ұйымдастырушылар компанияны тіркеп, кеңсе ашып, жарнама жүргізіп, жалған «табыс» көрсеткіштерін көрсеткен.
Нәтижесінде 78 адам қаржы пирамидасына 110 млн теңгеден астам қаражат салған. Күдікті қамауға алынып, сот санкциясымен оның жер учаскесіне тыйым салынды.
Қаржылық мониторинг агенттігі азаматтарға кез келген инвестициялық жобаның заңдылығын мұқият тексеріп, қаражат салмас бұрын оның сенімділігіне көз жеткізуді ескертеді.
