Шығыс Қазақстан облысы, Ұлан ауданына қарасты Бұқтырма су қоймасы маңындағы Аюда шатқалында, Приморск орманшылығы аумағында орман алқабы өртке оранды. Алапат өрт салдарынан шөп, бұталар мен ағаштар жанып, табиғи аумаққа айтарлықтай қауіп төнді.
Өрт шыққан аумаққа жедел түрде төтенше жағдай қызметтері жұмылдырылды. Оқиға орнына Төтенше жағдайлар министрлігінің авиациясы тартылып, әуе кемелері арқылы өрт ошағына су төгу жұмыстары жүргізілді. Сонымен қатар орман шаруашылығы қызметкерлерінен құралған десант және ШҚО ТЖД-ның жеке құрамы да тілсіз жаумен күреске кірісті.
Мамандардың айтуынша, өртті сөндіру жұмыстары таулы жер бедері мен қатты желдің әсерінен едәуір күрделенген. Желдің екпіні жалынды тез таратып, өртті толық ауыздықтауға кедергі келтірген.
Дегенмен, бірлескен жедел әрекеттердің нәтижесінде қазіргі уақытта өрттің таралуы тоқтатылып, ол оқшауланған. Қауіптің толық жойылуы үшін сөндіру және салдарын бақылау жұмыстары жалғасып жатыр.
