Әлем чемпионатының 1/8 финалында Испания құрамасына жол беріп, турнирден ұшып кеткен Португалия капитаны Криштиану Роналду жанкүйерлер мен медиаға ақжарма сұхбат берді. Футбол аңызы құрамадағы мансабын таза ар-ұятпен аяқтайтынын жеткізді.
Матчтан кейінгі баспасөз мәслихатында шабуылшы эмоциясын жасырмай, Португалия футболындағы өз дәуіріне қорытынды жасады.
«Ертең қалай оянамын дейсіз бе? Мен ертең таза ар-ұятпен оянамын. Себебі мен қолымнан келгеннің бәрін, тіпті одан да артығын жасадым. Мен Португалия үшін 3 бірдей халықаралық титул бағындырдым. Осыны ұмытпау керек. Криштиану келгенге дейін бұл елдің футболында бірде-бір рет мұндай жетістік болмаған еді», — деді капитан.
Сондай-ақ Роналду өз мансабындағы ең биік белесті атап өтті.
«Шынымды айтсам, мен өте бақыттымын. Менің ұлттық құрама жейдесінде бағындырған ең үлкен, ең маңызды жетістігім 2016 жылғы алтын болды. Мен үшін ол жеңістің салмағы дәл осы Әлем чемпионатының кубогымен тең. Себебін өздеріңіз де жақсы білесіздер. Қайталап айтамын, мен өзімнің ең үздік спорттық бабымда тұрғанымды білемін және еш өкінішсіз, таза ар-ұятпен кетіп барамын. Осымен бәрі аяқталды. Ертең жаңа күн, ал өмір жалғаса береді», — деді ол.
Еске сала кетейік, Испания мен Португалия арасындағы тартысты матч 1/8 финалдың ең басты текетіресіне айналып, 1:0 болып португалдықтардың жеңілісімен аяқталған болатын.
