Ішкі істер министрлігінің баспасөз қызметі Қуандық Бишімбаевты ұстаған полицейлерге қатысты қызметтік тергеудің аяқталғанын мәлім етті, деп хабарлайды Turanaqparat.kz.
Қызметтік тәртіпті бұзғаны үшін Патрульдік полиция полкі қызметінің инспекторына сөгіс жарияланды. Әкімшілік құқық бұзушылық туралы Қазақстан Республикасы Кодексінің 434-2 бабының талаптарын бұзғаны үшін Астана қаласы «Есіл» ауданы Полиция департаментінің жедел уәкіліне қатаң сөгіс жарияланды, — делінген хабарламада.
2023 жылдың қарашасында Қуандық Бишімбаевты ұстау кезінде полицейлердің бірі қаза болған Салтанат Нүкенованы меңзеп «өзі жыныңды келтірген шығар» деп айтқан болатын. Бұдан бөлек Бишімбаевқа далада темекі шегуге рұқсат етті.
Жасаған қылмысы дәлелденген Қуандық Бишімбаев 24 жылға сотталғанын еске сала кетейік.
