China Daily басылымының «WHY CHINA» бағдарламасына берген сұхбатында қазақстандық жас маман Ботакөз Елшібек (қытайша есімі – Йе Шэнли) Қытайдағы студенттік күндерінен бастап, Орталық Азия мен Қытай арасындағы мәдени және экономикалық байланыстарды нығайту жолындағы қызметіне дейінгі өмір жолын бөлісті. Оның оқиғасы – жеке табыстың ғана емес, Орталық Азия мен Қытай арасындағы серіктестіктің тереңдеп келе жатқанын көрсететін маңызды мысал.
Шамамен жеті-сегіз жыл бұрын Қытайға тіл үйренуге барған Ботакөзді бастапқыда қытай тілі мен мәдениеті қызықтырған. Гуйчжоу провинциясында білім алып жүрген кезінде «жеңіс жапырағы» деген мағына беретін қытайша есімін алып, қытай халқының тұрмыс-салтымен етене таныса бастайды. Ащы Гуйчжоу тағамдары, жатақханада достарымен бірге тұшпара жасау, каллиграфиямен айналысу секілді сәттер арқылы ол Қытайдың шыншыл, жылы шырайлы және ізгі ниетті келбетін танығанын айтады.
Бакалавр дәрежесін аяқтаған соң Ботакөз еріктілікпен және экономикалық ынтымақтастықты дамытумен белсенді айналыса бастады. Ол Қытай халықаралық импорт көрмесіне қатысып, қытайлық кәсіпкерлердің Орталық Азия ауыл шаруашылығы өнімдеріне деген жоғары қызығушылығын байқаған. Қазір ол China-Eurasian Business Council құрамында жұмыс істейді. Бұл кеңесте Ботакөз іс-шараларды ұйымдастырып, халықаралық қонақтарды қарсы алып, Орталық Азия жастары үшін жаңа мүмкіндіктер жасауға атсалысып келеді.
Жуырда Астанада өткен Қытай–Орталық Азия өнеркәсіпшілер комитетінің екінші отырысында Ботакөз ұйымдастырушылық жұмыстарға белсенді араласты. Мәдениетаралық байланысты үйлестіру, қонақтарды қарсы алу арқылы ол кәсіби шеберлігін ғана емес, өңір жастарының атынан өкілдік ету миссиясын да атқарды. Ботакөз бұл рөлін – Орталық Азияның жаңа буын мамандарының өңірлік ынтымақтастыққа белсене араласуына ықпал ететін маңызды мүмкіндік деп санайды.
Ботакөздің айтуынша, кәсіби қалыптасуына екі ел ұсынған кең ауқымды мүмкіндіктер үлкен әсер еткен.
«Қытайдың жаһандану үдерісіндегі рөлі тек ауқымымен емес, даму қарқыны, тұрақтылығы және ашықтығымен де ерекшеленеді. Қытай Орталық Азия елдерімен ортақ дамуға деген шынайы ниетін нақты істерімен дәлелдеп отыр», – деді ол сұхбатында.
Ботакөз сіңілісі Томириспен бірге Қытай қоғамына Қазақстанды таныту мақсатында «Qazaqland» атты жобаны қолға алды. Бұл бастама ұлттық тағамдар, мәдени шаралар мен халық арасындағы тікелей диалог арқылы еліміздің бейнесін насихаттауға бағытталған. Жоба дәстүрлі дипломатиядан тыс, халықтық арналар арқылы екі ел арасындағы сенімді нығайтуды көздейді.
Ботакөздің өмір жолы – «Бір белдеу, бір жол» бастамасы мен Орталық Азиядағы ынтымақтастықтың тереңдеу үдерісінде жастардың маңызды рөл атқарып отырғанының дәлелі. Олар тіл үйреніп, мәдени тәжірибе жинап, экономикалық әріптестікке белсенді араласу арқылы екіжақты қарым-қатынастың қозғаушы күшіне айналып келеді.
«Мен Қытайды таңдадым және бұл таңдауыммен мақтанамын. Бұл менің өмірімді өзгертті, әрі өзгелердің армандарын іске асыруға көмектесуге жол ашты», – деп түйіндеді Ботакөз.
