Ақмола облысы, Қосшы қаласындағы Сарқырама өзені жағалауында студенттер мен эко-еріктілердің қатысуымен ірі экологиялық сенбілік ұйымдастырылды.
Сенбілік «ReStart» республикалық жастар жобасы аясында өткізілді. Жоба Қазақстанның 10 өңірін қамтып, студент жастар арасында экологиялық мәдениетті қалыптастыруға, қалдықтарды бөлек жинауды дамытуға және қайта өңдеу мәдениетін ілгерілетуге бағытталған.
Аталған сенбілікке «Жасыл экономика үшін және G-Global-ды дамыту» коалициясы» ЗТБ, CCİ Kazakhstan өкілдері, сондай-ақ Астана қаласының 6 жетекші жоғары оқу орнының кураторлары мен студенттері қатысты. Олардың қатарында С. Сейфуллин атындағы Қазақ агротехникалық зерттеу университеті, Астана медицина университеті, Астана халықаралық университеті, Тұран-Астана университеті, Есіл университеті және Л.Н. Гумилев атындағы Еуразия ұлттық университеті бар.
Іс-шараны ҚР Экология, геология және табиғи ресурстар министрлігінің амбассадоры, БҰҰ-ның 4 ТДМ көшбасшысы Мариям Касымова ашты. Ол қатысушыларды қарсы алып, сенбіліктің мақсаттары мен қалдықтарды бөлек жинаудың маңызын түсіндірді.
Құттықтау сөз барысында Қосшы қаласы әкімдігі ТҮКШ бөлімінің басшысы Асқар Балтабайұлы және «ReStart» жобасының жетекшісі, «Жасыл экономика үшін» коалициясының Басқарма төрайымы Алия Рахимбекова сөз сөйледі. Олар жобаның маңызын атап өтіп, әр жиналған пластик көлемінің экология үшін үлкен мәні бар екенін жеткізді.
Бағдарлама аясында қатысушыларға экотренер тарапынан қысқаша практикалық тренинг өткізілді. Онда Zero Waste қағидаттары, пластикті дұрыс сұрыптау ережелері, жиі жіберілетін қателіктер және сенбілік кезіндегі экологиялық тәртіп түсіндірілді.
Сенбілік соңында жиналған пластик өлшеніп, алдын ала нәтижелер жарияланды. Сондай-ақ ЖОО-лар арасындағы экологиялық жарыстағы үлестер де есепке алынды.
Ұйымдастырушылардың мәліметінше, 28 сәуірден бері 10 өңірде өткен сенбіліктерге 600-ден астам адам қатысып, 4 500 келіге жуық пластик жиналып, қайта өңдеуге жіберілген. Қорытынды сенбіліктен кейін бұл көрсеткіш одан әрі артады деп күтілуде.
“ReStart” жобасы – Қазақстандағы студент жастардың экологиялық мәдениетін дамытуға бағытталған ең ірі экоплатформалардың бірі.
Дина Қуанышева
