Қостанай облысында өрескел қателік салдарынан тірі адам мемлекеттік деректер базасында “қайтыс болды” деп тіркеліп кеткен.
Tobolinfo мәліметінше, Қостанай қаласының тұрғыны Владимир Шремф 9 күн бойы ресми жүйеде “қайтыс болған” азамат ретінде көрсетілген. Ол тек АХАТ органдарына жүгінгеннен кейін ғана өзінің тірі екенін дәлелдеп, құқықтық мәртебесін қайта қалпына келтіре алған.
Оқиға Әулиекөл аудандық ауруханасында басталған. Марқұм болған анасының өлімі туралы құжат рәсімдеу кезінде медицина қызметкері деректерді қате енгізіп, қайтыс болған адам ретінде ұлының мәліметтерін тіркеп жіберген. Соның салдарынан тірі азамат жүйеде “жоқ” тұлғаға айналған.
Адвокат Дильмұрат Сәрсеновтің айтуынша, зардап шеккен азамат енді медициналық мекемені сотқа беріп, моральдық зиян үшін өтемақы талап етпек.
Владимир Шремф өзінің “қайтыс болғанын” кездейсоқ білген. Оның ЖСН-ы мен электрондық цифрлық қолтаңбасы істен шығып, мемлекеттік қызметтерге қол жеткізе алмаған. Құжаттарының жарамсыз болуына байланысты ол уақытша жұмыс істеу, көлік жүргізу және бірқатар сервистерді пайдалану мүмкіндігінен айырылған.
Бұл жағдай бір ғана жүйелік қателіктің азаматтың өміріне қаншалықты үлкен әсер етуі мүмкін екенін көрсетті. Енді іс сотта қаралып, жауапты тараптың әрекетіне құқықтық баға беріледі.
