Алматы қаласына іргелес ауылда болған жол-көлік оқиғасы адам өлімімен аяқталды.
Қайғылы жағдай Қарасай ауданына қарасты Абай ауылындағы Рысқұлов пен Әзербаев көшелерінің қиылысында болған. Жеңіл көлік пен мопед соқтығысып, салдарынан мопед жүргізушісі көз жұмды.
Алматы облыстық Полиция департаментінің мәліметінше, оқиға 5 сәуір күні тіркелген. Алдын ала деректерге сәйкес, BYD маркалы автокөліктің 37 жастағы жүргізушісі қосалқы жолдан шыға отырып, негізгі жолдағы көлікке жол бермей, мопедпен соқтығысқан.
Жол апаты салдарынан 42 жастағы мопед жүргізушісі алған жарақаттарынан оқиға орнында қайтыс болды.
Қазіргі уақытта көлік жүргізушісі уақытша ұстау изоляторына қамалды. Аталған факті бойынша қылмыстық іс қозғалып, сотқа дейінгі тергеу амалдары жүргізілуде.
