Қазақстан әуежайларының маңында орналасқан қоқыс полигондары ұшу қауіпсіздігіне айтарлықтай қауіп төндіріп отыр. Тек 2025 жылдың өзінде елде әуе кемелерінің құстармен соқтығысуының шамамен 300 жағдайы тіркелген. Бұл туралы Майкл Дэниел мәлімдеді.
Оның айтуынша, Атырау, Семей, Өскемен, Көкшетау, Балқаш және Үржар әуежайларының маңындағы қоқыс полигондары құстардың көп шоғырлануына себеп болып, әуе кемелерімен соқтығысу қаупін арттыруда. Бұл жағдай авиакомпаниялардың жұмысына да кері әсерін тигізіп отыр.
«2025 жылы құстармен соқтығысудың 280 жағдайы тіркелсе, биылғы жылдың бірінші тоқсанында тағы 33 жағдай анықталды», – деді Майкл Дэниел Үкімет отырысында.
Авиациялық әкімшілік әсіресе Атырау әуежайының маңындағы жағдайға алаңдаулы. Сонымен қатар, әуежайлар төңірегіндегі ретсіз құрылыс мәселесі де өзекті болып отыр.
Мәселен, Алматы әуежайының маңындағы аумақта 160-қа жуық кедергі анықталса, Шымкент әуежайы маңында 150-ден астам нысан тіркелген.
Қазақстанның авиациялық әкімшілігі мәселені шешу үшін әуежай маңындағы аумақтарды аймақтарға бөлу схемаларын әзірлеп, жергілікті әкімдіктерге жолдаған. Алайда бұл схемалар көп жағдайда елді мекендердің бас жоспарларына енгізілмеген. Соның салдарынан әуежайлар маңында жаңа нысандар мен кедергілердің пайда болуы жалғасып жатыр.
Майкл Дэниелдің сөзінше, ұшу қауіпсіздігін қамтамасыз ету және әуежайлардың тұрақты дамуын сақтау үшін жергілікті атқарушы органдармен өзара іс-қимылды күшейту қажет.
