Астанада өткен Өңірлік экологиялық саммиттің пленарлық отырысында Қасым-Жомарт Тоқаев халықаралық күн тәртібіндегі өзекті мәселеге тоқталды.
Мемлекет басшысы Біріккен Ұлттар Ұйымы Жарғысының маңызын атап өтіп, оны ішінара емес, толық әрі мүлтіксіз орындау қажет екенін айтты.
«Біз беталысы беймәлім, аумалы-төкпелі кезеңде өмір сүріп отырмыз. Бұл жағдай өңірлік және жаһандық тұрақтылыққа, миллиондаған адамның өмір сапасына әсер етуде. Соның салдарынан даму мен экологиялық проблемаларды шешуге бағытталуы тиіс ресурстар босқа жұмсалып жатыр. Мұндай жағдайда халықаралық қоғамдастықтың рөлі ерекше. Сексен жыл бұрын құрылған БҰҰ әлі күнге дейін баламасы жоқ әмбебап диалог алаңы болып қала береді. Алайда әлем түбегейлі өзгерді. Жасанды интеллект адамзат өміріне терең енді. Халықаралық құқықтың негізі саналатын БҰҰ Жарғысы жиі айтылғанымен, ол – қалауыңа қарай тапсырыс беретін жеңсік ас емес», – деді Президент.
Тоқаев халықаралық құқық нормаларын таңдаулы түрде қолдануға жол бермеу қажеттігін де атап өтті.
«БҰҰ Жарғысын біртұтас құжат ретінде қабылдап, оның қағидаттарын толық сақтау қажет. Халықаралық қарулы қақтығыстарға қатысты оны өз ыңғайымызға қарай қолданудан аулақ болған жөн. Сонымен қатар көпжақты институттарға деген сенімді сақтау маңызды. Өкінішке қарай, кейбір ірі халықаралық ұйымдардың беделі күрделі мәселелерді шешуге жетпей жатады», – деді Мемлекет басшысы.
