ОПЕК+ құрамындағы сегіз ел 5 сәуірде мұнай өндіру квоталарын ұлғайту мәселесін талқыламақ. Бұл шешім әзірге нақты жеткізілім көлеміне тікелей әсер етпейді, бірақ Ормуз бұғазы қайта ашылған жағдайда өндірісті жедел арттыруға дайын екенін білдіреді.
Reuters дереккөздерінің мәліметінше, қазіргі таңда бұл қадам нарықтағы ұсынысқа айтарлықтай ықпал етпейді. Себебі АҚШ пен Израильдің Иранға қарсы соғысына байланысты Ормуз бұғазы жабық күйінде қалып отыр.
Сарапшылардың айтуынша, бұл – нарыққа берілген «сигналдық» шешім. «Кем дегенде, қағаз жүзінде жауап беруіміз керек», – дейді дереккөздердің бірі.
Иранға қарсы қақтығыс мұнай жеткізіліміндегі ең ірі үзілістердің біріне айналды. Нәтижесінде ОПЕК-тің негізгі өндірушілері – Сауд Арабиясы, Ирак, Кувейт және Біріккен Араб Әмірліктері өндірісті қысқартуға мәжбүр болды. Айта кетейік, әлемдік мұнай саудасының 20%-дан астамы Ормуз бұғазы арқылы өтеді.
Ал Қазақстан, Ресей, Алжир және Оман үшін бұғаздың жабылуы тікелей әсер етпегенімен, олардың өндірісті арттыру мүмкіндігі шектеулі.
Нарықтағы жағдайды мұнай бағасы да көрсетіп отыр: Brent маркалы мұнай құны барреліне шамамен 120 долларға дейін өсіп, соңғы төрт жылдағы ең жоғары деңгейге жетті. Сонымен қатар Ресейдегі өндіріс көлемі украиналық дрон шабуылдары салдарынан төмендеп жатыр.
Бұл ретте Сауд Арабиясы мен Біріккен Араб Әмірліктері балама экспорт бағыттарын белсенді пайдаланып жатыр. Саудия мұнайды Қызыл теңіздегі Янбу порты арқылы тасымалдаса, БАӘ Фуджейра портына сүйенуде.
Айта кетейік, 1 наурыздағы соңғы отырыста ОПЕК+ сәуір айына арналған өндірісті тәулігіне небәрі 206 мың баррельге ғана арттыру туралы шешім қабылдаған еді.
2016 жылы құрылған ОПЕК+ альянсы мұнай нарығын тұрақтандыру мақсатында өндіріс көлемін үйлестіріп, жаһандық энергетика нарығында маңызды рөл атқарып келеді.
